Nadakpan sa kapulisan ang usa ka indibidwal atol sa gipahigayong buy-bust operation sa lungsod sa Ipil, Zamboanga Sibugay niadtong nakalabay nga adlaw.
Gipahigayon ang operasyon sa Station Drug Enforcement Team sa Ipil Municipal Police Station isip lead unit, kauban ang 903rd Regional Mobile Force Battalion 9, Philippine Drug Enforcement Agency Zamboanga Sibugay Provincial Office ug Regional Intelligence Unit 9. Miresulta kini sa pagkakumpiska sa siyam ka pakete sa gituohang shabu nga adunay gibana-banang gibug-aton nga 2.330 kilos ug standard drug price nga Php 15, 844,000.00.
Gawas sa ilegal nga droga, nakuha usab sa mga operatiba ang buy-bust money ug boodle money nga naglakip sa 27 ka 500-peso bills ug 65 ka 1,000-peso bills, usa ka cellphone, lighter, metal strainer, transparent cellophane, yellow eco bag ug abuhong jacket.
Sa pagkakaron, anaa na sa kustodiya sa Ipil Municipal Police Station ang nadakpang suspek alang sa hustong disposisyon, samtang ang mga nakumpiskang ebidensya sa droga ipadala sa Zamboanga Sibugay Forensic Unit alang sa qualitative ug quantitative examination.
