Naangol ang 11 ka indibidwal lakip ang duha ka driver human nagkasungag ang tulo ka sakyanan sa National Highway, Purok 2, Patag, Barangay Bagontaas, Valencia City sa alas-11:05 kagahapon sa buntag, Nobyembre 10, 2026
Base sa imbestigasyon sa Valencia City Police Station (CPS), nagbiyahe ang usa ka Suzuki Multicab PUJ gikan sa Malaybalay City paingon sa Valencia sa slow lane sa dihang kalit nga nitipas sa ilang linya ang usa ka Suzuki Minivan nga gikan sa pikas nga direksyon. Tungod sa kusog nga impak, mituali sa tuo nga bahin ang multicab ug naigo pa niini ang usa ka Honda XRM nga motorsiklo nga nagsubay sa shoulder lane.
Gidala sa Bukidnon Provincial Medical Center (BPMC) sa Malaybalay City ang 47-anyos nga driver sa multicab samtang ang pito niining pasahero gidala sa Valencia Polymedic General Hospital ug Bukidnon Provincial Hospital (BPH)-Maramag. Giatiman usab sa BPH-Maramag ang 45-anyos nga driver sa minivan ug ang duha niining pasahero, samtang ang 28-anyos nga driver sa motorsiklo nga nakahiagom sa minor injuries wala na nagpadala sa hospital.
Sa kasamtangan, gipaubos na sa hospital arrest ang driver sa minivan nga nasayrang walay napakitang driver’s license samtang nagpadayon ang imbestigasyon ug pagproseso sa kaso niiini.
Photo courtesy:Valencia City Police Station
