Makapaabot sa mas gipalambo nga mga pasilidad ug teknolohiya ang mga mag-uuma sa kape sa lalawigan sa Bukidnon human gipahigayon ang usa ka Technology Needs Assessment sa mga lungsod sa Libona, Maramag, Talakag, ug Lantapan niaging adlaw.
Ang maong inisyatibo gipangunahan sa Department of Science and Technology (DOST) Bukidnon kauban ang Provincial Government aron sutaon ug ilhon ang mga panginahanglan ug problema sa pagproseso human sa pag-ani.
Pinaagi sa maong pagtuon, giila ang kakulang sa igo ug angay nga mga kagamitan nga makapalambo sa kalidad ug gidaghanon sa green coffee beans o hilaw nga liso sa kape.
Tumong sa DOST ug sa kagamhanang probinsyal nga makahatag og sakto nga teknolohiya aron mas mapadali ang produksiyon, maminusan ang pagka-usik sa ani, ug mapatuman ang mas taas nga sukdanan sa kalidad sa kape nga gihimo sa komunidad.
Gilauman nga ang maong lakang dakong tabang sa pagpataas sa kita sa mga lokal nga mag-uuma ug sa tibuok industriya sa kape sa lalawigan sa Bukidnon.
Photo courtesy: DOST/Bukidnon
