Nadugang sa mga pasidungog sa Probinsya sa Davao de Oro ang pagkadawat niini og Gold Award atol sa GSIS Seal of Protection Awards 2026 nga gipahigayon sa Mactan, Lapu-Lapu City, Cebu. Lakip ang Davao de Oro sa 95 ka lokal nga panggamhanan sa tibuok nasud nga gihatagan og pasidungog, ug nahimong nag-inusarang probinsya sa Davao Region nga nakakuha sa Gold Award.
Sumala kang Governor Engr. Raul Mabanglo, unang higayon kini nga nakadawat ang probinsya og maong lebel sa award gikan sa Government Service Insurance System o GSIS. May kalabotan ang pagkilala sa paningkamot sa probinsya sa pagsiguro nga adunay insurance coverage ang mga kabtangan sa gobyerno, subay sa Republic Act No. 656 o Property Insurance Law.
Mitambong sa pagdawat sa pasidungog si GSIS Tagum Manager Jesusa Salonga, kauban si Acting PG Department Head Kirby Ryan Suarez, Property Division Head Mery Joji Pantinople ug Section Head Rulino Palma. Gipasalamatan usab sa gobernador ang mga kawani sa Kapitolyo, ilabi na ang Provincial General Services Office, sa ilang papel sa maong kalampusan.
