Nadakpan sa mga kapulisan sa lungsod sa Javier ang giklasipikar nga Top 1 Municipal Most Wanted Person nga giilang si alyas “Coco,” 27 anyos, ulitawo, walay trabaho ug residente sa lungsod sa Javier, Leyte, atol sa gipahigayong manhunt operation didto sa Sitio Tubigon, Poblacion Zone 1, Javier, Leyte niadtong nakalabay nga adlaw.
Atol operasyon, nasikop ang suspek pinasikad sa warrant of arrest tungod sa paglapas sa Section 7, Article II sa Republic Act No. 9165 o Comprehensive Dangerous Drugs Act of 2002, alang sa pagpatuman sa sentensiya nga gipahamtang sa korte.
Human sa pagkadakop, gipahibalo ang suspek sa hinungdan sa iyang pagdakop ug sa iyang mga katungod ubos sa Konstitusyon, gamit ang pinulongang iyang nasabtan. Samtang, gidala siya sa Javier Municipal Police Station alang sa dokumentasyon ug hustong proseso sa dili pa pormal nga itugyan ngadto sa korte nga nag-isyu sa warrant.
Photo courtesy: LPPO
