Pormal nga gidawat sa 93rd Infantry “Bantay Kapayapaan” Battalion ang bag-ong gihatasan nga mga opisyal ug enlisted personnel pinaagi sa gipahigayong Flag Raising Ceremony ug pinning of unit patch sa ilang kampo sa Kananga, Leyte niadtong Nobyembre 9, 2026.
Gipangunahan ni LTCol Celeste Frank L. Sayson INF (GSC) PA, uban sa ubang mga opisyal ug enlisted personnel, ang maong seremonya isip timaan sa pagdawat sa mga bag-ong miyembro sa batalyon.
Sa iyang mensahe, gipasiugda ni LTC Sayson ang kamahinungdanon sa dedikasyon ug pasalig sa pagserbisyo sa nasud ug sa katawhan. Giawhag usab niya ang tanang Bangiitan Troopers nga magpabiling lig-on sa pagtuman sa ilang mga katungdanan.
Matod sa batalyon, ang maong kalihokan nagpakita sa tradisyon, disiplina ug dedikasyon sa pagserbisyo isip mga miyembro sa Armed Forces of the Philippines (AFP).
Gipasalig usab sa 93rd Infantry “Bantay Kapayapaan” Battalion ang padayon nga pagtuman sa ilang misyon sa pagpalig-on sa kalinaw ug seguridad, subay sa labing taas nga sukdanan sa propesyonalismo ug serbisyo publiko.
Photo courtesy:93RD Infantry (Bantay kapayapaan) Battalion
