Nadakpan sa hiniusang operasyon sa kapulisan ug militar ang usa ka 23-anyos nga babaye nga giila nga miyembro sa Communist Terrorist Group (CTG) ug gikonsiderar nga No. 1 Provincial Most Wanted Person sa Eastern Samar, sa Sitio Casapa, Barangay Denigpi-an, Dolores, niadtong Nobyembre 9, 2026.
Giila ang nadakpan sa alyas nga “Marie,” residente sa Dolores, Eastern Samar, nga nalista usab sa Periodic Status Report (PSR) sa kapulisan ug giingong gitudlo isip medical personnel sa Squad 2, SRGU Laysan, SRC ARTIC sa Eastern Visayas Regional Party Committee. Giingong naglihok ang maong grupo sa mga lungsod sa Gamay, Mapanas ug Palapag sa Northern Samar. Nadakpan siya pinaagi sa warrant of arrest tungod sa paglapas sa Republic Act 11479 o Anti-Terrorism Act of 2020, duha ka kaso sa murder, tulo ka kaso sa frustrated murder ug robbery.
Gipahigayon ang operasyon sa 801st Maneuver Company sa Regional Mobile Force Battalion 8 kauban ang nagkadaiyang intelligence ug police units, Dolores Municipal Police Station ug 52nd Infantry Battalion sa Philippine Army. Gidala ang suspek sa Dolores Municipal Police Station alang sa dokumentasyon ug hustong disposisyon. Matud sa Police Regional Office 8, kabahin kini sa ilang padayong operasyon batok sa mga wanted nga indibidwal pinaagi sa koordinasyon ug pagpaambitay og intelligence information sa nagkadaiyang ahensya.
Photo courtesy: PRO 8
