Gipalapdan ang kahibalo sa komunidad bahin sa pagpugong ug pagpakunhod sa mga kaso sa African Swine Fever (ASF), gipahigayon niadtong Nobyembre 11, 2026, sa AVR 4, City Hall of Tagum, ang “May Magagawa Ako” ASF Information Caravan nga gitambongan sa nagkalainlaing sektor nga direktang nalambigit sa hog industry.
Pinaagi niini, gihatagan sila og impormasyon ug giya bahin sa ASF, lakip ang mga angay nga buhaton aron malikayan ang pagkaylap sa maong sakit. Sumala sa datos sa Department of Agriculture – Bureau of Animal Industry (DA-BAI) as of October 22, 2026, nakarekord ang nasud og pagsaka sa mga kaso sa ASF niadtong Septyembre 2026, samtang adunay mga barangay nga nagpadayon pa sa recovery gikan sa maong sakit.
Sa kasamtangang ASF Color-Coding Scheme, nahimutang ang syudad sa Tagum sa Pink Zone o buffer zone. Nagpasabot kini nga wala pa’y natala nga kaso sa ASF sa siyudad, apan duol kini sa mga lugar nga adunay kumpirmadong kaso sa maong sakit.
Tungod sa dakong epekto sa ASF sa panginabuhian sa hog raisers, gikinahanglan ang panaghiusa ug aktibong pag-apil sa matag sektor sa pagpugong sa pagkaylap niini, pagsiguro sa hustong pag-atiman sa mga baboy, ug pagpanalipod sa ilang panginabuhian.
Photo Courtesy: LGU-Tagum
