Gipahigayon sa kagamhanang lokal sa dakbayan sa Valencia ang DAGYAW 2026 Townhall Meeting niadtong Setyembre 28 aron mapalig-on ang partisipasyon sa katawhan ug ipatuman ang bukas, transparent, ug inklusibong pamunoan. Gitigom sa maong kalihokan ang mga opisyal sa lokal nga gobyerno, Civil Society Organizations (CSOs), ug uban pang mga stakeholders aron magtinabangay sa pag-ila sa mga panginahanglanon sa komunidad ug paghan-ay sa mga prayoridad nga programa sa kalamboan.
Atol sa sesyon sa buntag, gipresentar ni LGOO II Caezar Ian Encarnacion ang Philippine Open Government Partnership (PH-OGP) Localization ug gipalapdan ni LGOO V Merryane Rose S. Bacud ang kinatibuk-ang katuyoan sa DAGYAW. Nagsilbing keynote speaker si DILG Region 10 Assistant Regional Director Yvette Tolentino-Sunga kinsa nipasibaw sa kaimportante sa hiniusang paningkamot sa gobyerno ug katawhan. Lakip sa mga pangunang highlight mao ang opisyal nga papanumpa sa mga sakop sa Valencia City Local People’s Council (LPC) ug ang pagpirma sa Collective Commitment and Partnership Board.
Pagkahapon nga bahin, nipahigayon og Problem Solution Workshop ug usa ka open forum nga gitawag og “Talakayan” diin ang mga partisipante nagtinabangay sa pagbuhat og mga konkretong solusyon para sa mga flagship program sa dakbayan. Pinaagi sa bukas nga pagbayloay og ideya sa taliwala sa LGU, CSOs, ug LPC, gipamatud-an sa maong inisyatibo nga ang maayong pamunoan usa ka hiniusang responsibilidad nga makab-ot pinaagi sa aktibong partisipasyon sa tanan.
Photo courtesy: DILG – Bukidnon
