Gi-amyendahan sa Sangguniang Panlungsod sa Malaybalay ang ordinansa sa mga meat shop aron dungagan kini ug 25 ka bag-ong slots, gikan sa karaan nga limitasyon nga 25 lamang. Sumala ni Councilor Jason Chad Ayala, miabot na sa tulo ka resolusyon ang giaprubahan alang sa dugang mga tindahan sa karne sa syudad, diin nagpakita sa opisyal nga talaan sa city monitoring board nga adunay 28 ka meat shop nga naglakip sa mga permiso nga molungtad hangtod sa 10 ka tuig.
Aron masolusyonan ang reklamo sa mga lokal nga hog raisers ug backyard farmers nga wala nay madawat nga sakto nga halin tungod sa kakuwang sa buyer, nagtagbo ang panggamhanang lokal sa pakigtambayayong sa mayor aron magtukod ug usa ka asosasyon. Pinaagi sa maong grupo, nagpahimutang sila ug kaugalingong meat shop sa Barangay 6 diin masiguro ang mas maayong presyo sa pagpalit sa mga baboy gikan sa mga miyembro ug mas barato nga baligya sa publiko
Giingon usab sa konsehal nga ipadayon ang pag-ihaw sa tanang baboy sa pampublikong slaughterhouse, diin aduna nay nakagahin nga budget aron makapalit ug bag-ong kagamitan alang sa mas maayong pasilidad. Dugang pa niini, giproseso na kauban ang City Legal Office ang pagpagawas ug Executive Order aron mahimong exclusive ug sigurohon nga ang mga baboy lamang gikan sa Malaybalay maoy tugotang maihaw sa maong pasilidad
Photo courtesy: SP Malaybalay City
