Dili matupngan nga pagpasalamat nga gipadayag sa Provincial Government of Bukidnon, ngadto sa mga sakop sa kasundaluhan ubos sa 403rd Infantry Brigade atol sa gipahigayon nga 8th Infantry Battalion Warriors’ Night niadtong nakalabay nga adlaw sa Maramag.
Gitunol sa maong okasyon ang espesyal nga mga ganti ug pahalipay alang sa army operating units human sa ilang malampusong misyon sa pagpuhag sa walhong grupo sa North Central Mindanao Regional Committee ug pagbalik sa kasegurohan sa probinsya.
Sa iyang pamulong isip dinapit nga bisita, gibutyag ni Governor Rogelio Neil P. Roque nga human sa daghang katuigan nga pag-antos gikan sa hulga sa insurhensiya nga nakabalda sa panginabuhian ug nagdala og kahadlok sa komunidad, nagsulat na karon ang Bukidnon og bag-ong yugto sa kalinaw ug paglaum pinaagi sa kaisog sa militar. Gipasidunggan usab niini ang combat excellence awardees ug ang mga partner-agencies nga nakigtambayayong alang sa kalamboan sa lalawigan
Sa maong higayon, nipadangat usab si LTC Jeorge R. Jallorina, commander sa 8IB, sa iyang dakong pagpasalamat sa PGB ug sa tanang stakeholders sa walay paghubas nga suporta sa ilang kampanya alang sa kalinaw.
