Nahimong viral sa social media ang usa ka Jack Russell Terrier nga ginganlag Khloe, gikan sa Kentucky, Estados Unidos human gipahimoan kini sa iyang fur parent og maternity photoshoot niadtong 2021.
Si Caitlin Snyman, usa ka animal photographer, nagdesisyon nga himoan og espesyal nga photoshoot si Khloe isip selebrasyon sa iyang unang pagmabdos. Giandam ang pink nga background, mga bulak, ribbon ug humok nga habol aron mahimong murag tinuod nga maternity pictorial ang dating.
Komportable kaayo si Khloe atubangan sa camera ug daw kahibalo gyud unsaon pag-pose. Makita siya sa mga litrato nga nagpakita sa iyang nagtubo nga tiyan, samtang sa uban nga hulagway naghigda siya nga nakapiyong ang mga mata.
Ang photoshoot unta para lang sa pamilya ug mga higala, apan mikatag dayon ang mga litrato sa social media ug nakadani sa daghang animal lovers. Upat ka itoy ang gianak ni Khloe niadtong panahona, ug nakadawat siya og mga komento nga daw usa ka propesyonal nga modelo.
Paglabay sa mga tuig, mibalik pag-viral ang mga litrato ni Khloe niadtong Septiyembre 2026, nga nakahatag pag-usab og lain-laing reaksyon gikan sa mga netizen. Ang uban nakakaplag niini nga cute ug makalingaw, samtang ang uban nag-ingon nga sobra ra ang pagtratar sa iro nga daw tawo.
Apan alang sa daghang pet owners, simple ra ang rason nga kung ang iro giisip nga unang baby sa pamilya, nganong dili man siya hatagan og maternity photoshoot.
Photo courtesy: instagram
