Gitangtang sa iyang trabaho ang usa sa ka Italyanong chef sa Brisbane, Australia human siya nagdumili sa pagbutang og pinya sa pizza usa ka buhat nga giisip niya nga “insulto sa iyang kultura.”
Si Davide Tamburella, kanhi chef sa restawran nga La Costa, gitangtang sa trabaho niadtong Mayo human sa pipila ka mga reklamo gikan sa pagdumala mahitungod sa iyang pamatasan sulod sa trabahoan. Usa sa mga reklamo mao ang iyang pagdumili sa pag-andam og pizza nga adunay ham ug pinya alang sa mga bisita sa usa ka kalihokan.
Matod ni Tamburella, dili siya obligado nga mosunod sa mga instruksyon sa pagdumala kung kini supak o makapasakit sa iyang kultura isip usa ka Italyano. Kini nga mga detalye migawas human nagpasaka si Tamburella og reklamo bahin sa dili makatarunganong pagtangtang sa trabaho (unfair dismissal) ngadto sa Fair Work Commission sa Australia.
Sa desisyon sa Komisyon, gipahayag nga nagdumili si Tamburella sa paggamit og pinya tungod kay nagtuo siya isip usa ka Italyano nga ang pagbutang niini sa pizza usa ka insulto sa iyang kultura. Dili lang kini usa ka higayon nga nahitabo; sumala pa, tulo ka beses siyang nagdumili sa pagbutang og pinya sa pizza sulod sa upat ka tuig. Giingong gihangyo pa gani niya ang iyang amo nga hunahunaon kung unsa ka importante alang sa mga Italyano nga dili ibutang ang pinya sa pizza.
Ang makapainteres pa, ang restawran nahimutang sa Queensland nga nailhan isip “Pineapple Heartland of Australia” diin gikan ang tanang pinya nga gipatubo alang sa komersyo sa maong nasod.
Hinuon, giklaro sa desisyon nga ang isyu bahin sa pinya dili lang mao ang bugtong rason sa pagtangtang kang Tamburella. Nagpahayag usab og kabalaka ang pagdumala mahitungod sa iyang giingong paggamit og mga pulong nga makapasakit o bastos samtang anaa sa trabaho.
Gihisgotan usab ang usa ka insidente niadtong Abril, diin nabali ang iyang tuong kamot human niya gisuntok ang usa ka metal nga barandilya.
Sa katapusan, wala gidawat sa komisyon ang iyang reklamo bahin sa dili makatarunganong pagtangtang sa trabaho tungod kay milabay na ang gitakdang panahon alang sa pagpasaka niini.
Samtang, nasayran nga si Tamburella nagtrabaho na karon sa laing restawran sa Brisbane. Sumala sa mga taho, walay bisan usa sa mga pizza sa iyang bag-ong trabahoan ang adunay pinya.
Photo Courtesy: 7news
