Nagmabungahon ang gipahigayong 2026 Dakak Annual Invitational Fishing Tournament nga gipasiugdahan sa BJMP Dipolog City District Jail–Male Dormitory didto sa Dakak beach resort sa Barangay Taguilon, Dapitan City, adlaw nga Sabado, Nobyembre 7, 2026.
Misalmot sa maong kompetisyon ang 152 ka anglers gikan sa nagkalainlaing lugar, lakip ang mga personahe sa BJMP gikan sa nagkadaiyang district jail sa Region 9 ug mga partisipante gikan sa ubang rehiyon.
Adunay duha ka kategoriya ang maong torneyo, ang Ultralight/Light Tournament ug Bait and Wait Tournament. Gihatagan og cash prizes ang unang tulo ka mananaog sa matag kategoriya, lakip ang special awards alang sa Longest Catch, Smallest Catch ug First Catch.
Matud ni JCINSP Jonathan N. Arawangsa, Jail Warden sa BJMP Dipolog City District Jail–Male Dormitory, dili kini usa ka for a cause, kondili usa ka community-based approach aron mapalambo ang kahibalo sa publiko nga ang ilang serbisyo dili lang kutob sulod sa pasilidad, kondili naglakip usab sa aktibong pakig-uban sa komunidad.
Samtang, mipadayag si JSUPT Miguel D. Langcauon, Regional Chief of Directorial Staff sa BJMP Regional Office IX, ubos sa pagpanguna ni Regional Director JCSUPT Amado A. Concepcion Jr., CESE, nga ang pagpangisda nagkinahanglan og pasensya, hustong timing, pagkamalahutayon ug maayong pagplano. Matud pa niya, importante usab nga maangkon sa mga jail warden ang maong mga abilidad sa pagtuman sa ilang mga katungdanan.
Usa sa mga misalmot mao si Sam Samarinta sa Goodvibes Dipolog Angler, nga mipadayag nga nindot ang lugar ug nagpasalamat nga nakakuha siya og nukos atol sa maong tournament.
Pinaagi sa maong kalihokan, mapalig-on ang panaghiusa, sportsmanship ug camaraderie tali sa mga personahe sa BJMP ug mga fishing enthusiasts.
