Duha ka gidudahang nalambigit sa ilegal nga droga ang nadakpan sa duha ka managlahing buy-bust operation sa lungsod sa Tampakan ug Lake Sebu, South Cotabato niadtong nakalabay nga adlaw.
Gipahigayon ang unang operasyon sa Tampakan Municipal Police Station, samtang ang ikaduha gipahigayon sa Lake Sebu Municipal Police Station. Nagtinabangay niini ang Philippine Drug Enforcement Agency o PDEA Region 12 ug ubang yunit sa kapulisan.
Nakuha sa duha ka operasyon ang mokabat sa 0.233 gramos nga gidudahang shabu nga adunay gibanabanang kantidad nga ₱1,278.00. Narekober usab ang kuwarta nga gigamit sa buy-bust operation.
Ang duha ka nadakpan anaa na karon sa kustodiya sa kapulisan. Giandam na ang mga sumbong batok kanila tungod sa giingong paglapas sa Section 5, Article II sa Republic Act 9165 o Comprehensive Dangerous Drugs Act of 2002.
Matod sa South Cotabato Police Provincial Office ubos sa pagpanguna ni Acting Provincial Director PCOL Isralene Z. Lauren, ipadayon nila ang mga operasyon batok sa ilegal nga droga sa probinsya.
Photo courtesy: SCPPO
