Gidakop sa kapulisan ang 41-anyos nga lalaki tungod sa kasong seksuwal nga pag-abuso sa menor de edad sa Barangay Old Poblacion, Maitum, Sarangani Province, pasado alas-siyete sa gabii niadtong Nobyembre 5, 2026.
Gipatuman sa mga personahe sa Maitum Municipal Police Station, ubos sa pagpanguna ni PMAJ Ramil B. Aruelo, ang warrant of arrest batok sa suspek nga giatubang ang kasong Qualified Rape by Sexual Assault of a Minor ug duha ka counts sa Acts of Lasciviousness.
Ang maong mga kaso gibase sa mandamiento de aresto nga gipagawas sa Regional Trial Court, Family Court, Branch 10, sa Alabel, Sarangani Province. Gipasiugda sa Sarangani Police Provincial Office nga magpadayon ang ilang kampanya batok sa mga kriminal ug sa pagpanalipod sa komunidad, ilabina sa mga kabataan.
Ang kapulisan sa Sarangani ubos sa pagpangulo ni PCOL Jerone Orville P. Panganiban nagpahinumdom nga walay undang ang ilang paningkamot sa pagpatuman sa balaod ug pagpanagot sa mga nakalapas niini.
Photo courtesy:SPPO
