Nakarekober ang kapulisan og usa ka .38 caliber revolver, duha ka magasin sa .45 caliber ug upat ka buhing bala human sa insidente sa pagpamusil nga naglambigit sa mga armadong indibidwal ug mga pulis sa Barangay Apopong, General Santos City, pasado alas 4:30 sa kaadlawon niadtong nakalabay nga adlaw.
Narekober ang maong mga armas ug bala sulod sa usa ka puti nga sakyanan nga gibiyaan sa mga suspetsado sa Purok 11, Lanton. Base sa report, mitubag ang mga personnel sa GSCPO ug SWAT Team sa reklamo bahin sa kagubot nga naglambigit sa mga armadong tawo.
Apan samtang nag-imbestigar, nakadungog ang mga pulis og sunod-sunod nga buto sa pusil. Giingong gipusil usab sa mga suspetsado ang mga responding personnel sa wala pa sila nakaikyas.
Giseguro sa kapulisan ang kaluwasan sa mga sibilyan ug gilimpyohan ang lugar human sa insidente. Samtang, nagpadayon ang hot pursuit operation aron mailhan ug madakpan ang mga suspetsado.
Photo courtesy: PRO 12
