Giklaro sa Digos City Police Station nga dili carnapping ang insidente sa pedicab sa Digos City, kondili may kalabotan sa wala pagbalik sa gi-rentahan nga pedicab ngadto sa tag-iya niini.
Base sa imbestigasyon, gi-rentahan ang pedicab niadtong Oktubre 9, 2026, apan wala kini ibalik ug giingong gihimong kolateral sa laing indibidwal sa Padada, Davao del Sur, nga walay pagtugot sa tag-iya.
Pinaagi sa koordinasyon sa kapulisan sa Digos City, Sta. Maria ug Padada, malampusong narekober ang maong pedicab. Gipasabot sa Digos City Police Station nga adunay pagtugot sa tag-iya sa unang pagkuha sa pedicab, busa dili kini gikonsiderar nga carnapping.
Giawhag usab ang publiko nga likayan ang pagpakaylap sa wala mapamatud-ang impormasyon sa social media.
