Patay na ang usa ka call center agent human sa pila ka adlaw nga pakigbisog sa kinabuhi sa ospital tungod sa aksidenteng nahitabo sa Cebu South Coastal Road, sa Barangay Cansojong, Dakbayan sa Talisay. Giila ang biktima nga si Glenn, hingkod ang edad ug residente sa Dakbayan sa Sugbo.
Base sa imbestigasyon sa City of Talisay Traffic Operation Development Authority (CT-TODA) ug Police Traffic Enforcement Section (PTES), nagsubay sa outer lane ang motorsiklo nga gimaneho sa biktima sa dihang kalit kini nga misulod sa inner lane.
Tungod niini, nabanggaan ang motorsiklo sa laing motor, hinungdan nga gilupad ang biktima. Gidala pa kini sa ospital apan human sa pipila ka adlaw, nakabsan kini sa kinabuhi.
Sumala sa rekord sa CT-TODA, ang maong aksidente mao na ang ika-19 nga insidente sa kamatayon nga natala tungod sa aksidente sa dalan sa Dakbayan sa Talisay.
Photo Courtesy: Shutterstock
