Gipatuman sa Department of Environment and Natural Resources (DENR) ang pinakataas nga lebel sa alerto alang sa mga lakang batok sa posibleng pagkaylap sa sunog sa kalasangan tungod sa grabeng kainit sa panahon. Nagpatuman na ang mga rehiyonal nga buhatan sa ahensya og nagkalain-laing lakang aron masiguro ang kaluwasan sa mga kabukiran ug kasagbotan batok sa hulga sa sunog.
Lakip sa mga lakang nga ipatuman mao ang pagtalaga og mga personahe alang sa pagpanalipod sa kalasangan, pagpahigayon og pagbansay alang sa mga opisyal, pagbutang og mga fireline, pagdili sa pagsunog sa mga basura ug tanom sa gawas (open burning), ug temporaryong pagsira sa mga lugar nga daling maapektuhan sa sunog. Magpatuman usab og 24-oras nga pagbantay ang mga Quick Response Team sa matag rehiyon aron dali silang makatubag sa bisan unsang insidente sa sunog sa kalasangan.
Gihangyo sa pamunuan sa DENR ang kooperasyon sa tanang katawhan, lakip na ang mga mag-uuma ug mga opisyal sa lokal nga panggamhanan, nga likayan ang pagsunog ug pag-uma pinaagi sa kaingin. Tumong niini nga mapugngan ang pagkaylap sa sunog ug mapanalipdan ang atong mga kalasangan ug uban pang natural nga kahinguhaan.
Photo courtesy: DENR
