Gitudlo ni President Ferdinand Marcos Jr. si Supreme Court Associate Justice Rodil V. Zalameda isip sunod nga Chief Justice sa Korte Suprema, hulip kang Chief Justice Alexander Gesmundo nga moabot na sa mandatory retirement sa Nobyembre 6.
Gipahibalo ni Presidential Communications Office (PCO) Secretary Lino Cayetano niadtong Huwebes ang pagtudlo kang Zalameda, nga adunay kapin sa tulo ka dekadang kasinatian sa sistema sa hustisya.
Nakaalagad na si Zalameda isip opisyal sa korte, public prosecutor, Court of Appeals Justice ug Associate Justice sa Supreme Court.
Sumala sa PCO, gihatagan og gibug-aton sa Presidente ang kamahinungdanon sa eksperyensiyado ug adunay prinsipyo nga pagpangulo aron mapadayon ang pagsalig sa publiko sa hudikatura.
Nagpadayag usab si Marcos sa iyang pagsalig nga tumanon ni Zalameda ang bag-ong responsibilidad uban ang integridad, walay pagpihig ug lig-on nga pagbarog sa rule of law.
Nagpaabot usab ang Malacañang og pahalipay kang Zalameda ug pasalamat kang Gesmundo tungod sa iyang dedikadong serbisyo sa nasud.
Photo Courtesy:Wikipedia
