Gipahibalo ni Board Member Princess Emano atol sa ika-62 nga Regular Session sa Sangguniang Panlalawigan sa Misamis Oriental ang umaabot nga committee meeting kalabot sa Climate Change Adaptation ug Disaster Risk Reduction nga iyang gipangulohan.
Gikatakdang ipahigayon ang tigom sa Disyembre 9, 2026, ala 9:00 sa buntag, diin hisgotan ang Provincial Disaster Risk Reduction and Management Plan 2026, ang pagtukod og duha ka satellite Emergency Operations Centers alang sa una ug ikaduhang distrito, ug ang 2026 El Niño Action Plan sa probinsiya.
Matud ni Emano, gitumong ang pagtukod sa duha ka satellite centers aron mas mapadali ang pagresponde sa mga emerhensiya, ilabi na sa panahon sa kalamidad. Apan wala pa matino ang eksaktong lokasyon niini ug hisgotan pa kini sa committee meeting.
Lakip usab sa agenda ang mga lakang sa pagpangandam batok sa posibleng epekto sa El Niño. Gilauman nga motambong ang nagkalain-laing ahensiya sama sa DRRMO, Agriculture, Environment, Health, DILG, ug mga representante sa mga mag-uuma ug mananagat aron mas mapalawom ang diskusyon ug mapalig-on ang pagpangandam sa probinsiya.
Photo courtesy: Wikipedia
