Mag-atubang ang mga boksidor alang sa mga championship title sa Fist of Fury 13 nga ipahigayon sa Chao Sy International Promotions ug Cebu City Sports Commission (CCSC) karong Nobyembre 14 sa Fuente Osmeña Circle dakbayan sa Sugbo.
Sa main event, mag-atubang si Cebuano boxer John Kevien Jimenez sa Chao Sy Boxing Stable ug si Carlo Diaz VII alang sa Philippine Games and Amusements Board (GAB) minimumweight title.
Matod sa promoter nga si Chao Sy atol sa press conference gipili niya ang Fuente Osmeña aron makatan-aw ang mga Sugbuanon og dekalidad nga boxing event nga walay bayad sa entrance.
Gawas sa professional bouts, maglakip usab ang programa og kapin sa usa ka dosenang amateur fights aron mahatagan og dugang exposure ug kompetisyon ang mga lokal nga boksidor.
Gilauman usab nga ipahigayon ang mga sangka bisan adunay posibilidad sa dili mayo ang panahon. Apan kon mag-uwan, gikonsiderar ang Cebu City Sports Institute sa Barangay Sawang Calero isip alternatibong venue.
Matod pa ni Sy, lakip sa fight card ang usa ka walo ka rounds nga championship bout ug duha ka upat ka rounds nga away.
Gipasalig usab niya nga ipadayon ang paghatag og kahigayonan sa mga amateur boxer aron mapalambo ang talento sa lokal nga boksing.
Photo Courtesy: Cebu Daily News
