Arestado ang usa ka babaye atol sa buy-bust operation sa mga otoridad sa Purok 6, Barangay Poblacion A, M’lang, Cotabato, bandang alas-10:30 sa gabii niadtong Septiyembre 27, 2026. Giila sa M’lang Municipal Police Station ang suspek nga alyas “Ann,” 43 anyos, single, self-employed ug residente sa Barangay New Antique, M’lang, North Cotabato.
Ubos sa operasyon sa Drug Enforcement Unit sa M’lang MPS, kauban ang CPPO-PPDEU ug Police Intelligence Unit, nakapalit ang poseur buyer og usa ka heat-sealed sachet nga adunay puti nga crystalline substance nga gituohang shabu. Nakumpiska usab gikan sa suspek ang tulo pa ka sachet nga adunay susamang gituohang kontrabando ug ang marked money nga gigamit sa operasyon.
Mokabat sa 0.1 gramos ang gibanabang kinatibuk-ang gibug-aton sa gituohang ilegal nga droga, base sa inisyal nga report. Ingon man ang mga nakumpiskang sachet ipailalom sa laboratory examination sa Cotabato Provincial Forensic Unit aron mapamatud-an ang ilang sulod.
Samtang, ang suspek ug mga nakumpiskang ebidensya gidala sa M’lang MPS alang sa dokumentasyon ug hustong disposisyon. Giandam na usab sa kapulisan sa kasong paglapas sa Sections 5 ug 11 sa Republic Act 9165 o Comprehensive Dangerous Drugs Act of 2002, samtang nagpadayon ang imbestigasyon ug pagproseso sa kaso.
