Patay ang duha ka indibidwal samtang duha pa ang nasamdan human sa nahitabong panagbangga sa duha ka motorsiklo sa Quezon Avenue National Highway, Barangay Poblacion 1, Midsayap, Cotabato, pasado alas-1 sa kaadlawon ning Martes Septiyembre 29, 2026.
Giila nga ang namatay sa disgrasya nga usa ka 21-anyos, Mark Nathaniel Jardeliza, drayber sa Honda Click 150, nga gideklarang dead on the spot sa lugar.
Lakip sa usab sa disgrasya 17-anyos nga pasahero sa Mio 125 nga giila nga alyas “Anna”, gideklarang dead on arrival sa tambalanan.
Samtang, duha ang nakahiagom og samad ang pasahero sa Honda Click nga giila sa alyas “Loren” ug ang 18-anyos nga drayber sa Mio 125 nga giila sa alyas nga “John Michael.”
Base sa inisyal nga imbestigasyon sa Midsayap MPS, nagbiyahe sa samang direksiyon ang duha ka motorsiklo sa dihang giingong kusog ang dagan sa Honda Click ug nabangga ang likod sa Mio 125 duol sa Bakeshop sa maong dapit.
Mitubag dayon sa Midsayap MDRRMO ang mga nasamdan ug gidala sa Dr. Amado Diaz Provincial Foundation Hospital alang sa medical nga pag-atiman.
Padayon pa ang imbestigasyon aron matino ang tukmang hinungdan ug sirkumstansya sa aksidente, samtang anaa sa kustodiya sa Traffic Section sa Midsayap MPS ang duha ka motorsiklo alang sa dokumentasyon ug dugang nga imbestigasyon.
Photo courtesy: MIDSAYAP PNP
