Nakakaplag og dugang panginabuhian ang mga kababayen-an sa Daram, Samar, pinaagi sa paghimo og asin gamit ang solar salt production, uban sa tabang sa Department of Agriculture-Bureau of Fisheries and Aquatic Resources o BFAR Region 8.
Nakabenepisyo niini ang Daram Association of Fish and Squid Processors ug Brgy. Ubo Dried Fish Vendors Association, nga gihatagan og mga kagamitan ug inputs nga nagkantidad og 100 mil pesos matag asosasyon, lakip ang solar salt production modules, generator, pump ug drums.
Sa proseso, ang tubig-dagat limpyohan ug ipauga gamit ang kainit sa adlaw hangtod maporma ang mga kristal nga asin sulod sa upat hangtod lima ka adlaw, depende sa panahon.
Sa ilang unang produksyon, nakahimo na ang duha ka asosasyon og 180 kilos nga asin, nga gigamit usab sa ilang fish-drying activities. Gibaligya usab ang locally produced salt sa 20 pesos matag kilo, nga nahimong dugang produkto ug tinubdan sa kita sa mga miyembro.
Gilauman nga dugangan pa sa BFAR ang suporta pinaagi sa 300 mil pesos nga kantidad sa collapsible salt production setups aron mapalapad ang produksyon ug makahatag og dugang oportunidad sa panginabuhian sa mga coastal community.
Photo courtesy: BFAR
