Gitugyan na sa Department of Social Welfare and Development (DSWD) ang tulo ka mga estudyante sa Pangantucan Community High School sa Bukidnon human sila naghimo og peke nga tawag sa 911 National Emergency hotline.
Ang maong prank call, nga gihimo niadtong Setyembre 22 gikan sa sulod sa comfort room sa tunghaan diin naggamit sila og alyas, nagpahibalo og bakak nga “active shooting” nga naghatag og matang sa kahadlok sa buhatan sa kapulisan ug sa pamunoan sa eskwelahan.
Sumala ni School Principal Kim Peter Diez, kumpirmado nga usa lamang ka hoax ang maong, insidente, apan daling gisuspende ang klase isip pamaagi sa pagsiguro sa kaluwasan sa tanang estudyante ug personnel. Matud pa, naaksyonan na sa mga awtoridad ang maong kaso ug balik na sa normal ang mga klase karong adlawa, Lunes, Setyembre 28, 2026.
Gipahinumdoman sa school administration ang mga estudyante nga dili gamiton sa sayop ang emergency hotline tungod kay mahimong makaapekto kini sa pagtubag sa mga tinuod nga emerhensiya. Nagpasalamat usab si Principal Diez sa mga ginikanan sa ilang kooperasyon ug pagpabiling kalmado atol sa insidente.
Photo courtesy: Pangantucan Community High School
