Nirepresentar sa Pilipinas ang tulo ka estudyante gikan sa Valencia National High School human mapili ang ilang gimugna nga eco-themed mobile game sa Krafton’s BETTER GROUND 2026 international summit sa Seoul, South Korea.
Ang “Team PhsynTak”—nga gilangkuban nila Kent Dave R. Pilar, Pshych Earl B. Caleñada, ug Thomas Kyle L. Galo—usa sa 17 ka finalist teams nga gipili gikan sa kapin 1,000 ka aplikante sa tibuok Asya.
Gipasundayag sa maong grupo ang ilang dula nga “GENOMORPH,” usa ka action role-playing game diin ang magdudula mamahimong usa ka baki nga kinahanglang manglimpyo sa nadaot nga kalikopan ug mopasig-uli sa balanse sa ekolohiya. Gipadayag ni Thomas Kyle Galo nga ang konsepto sa dula nakabase sa tinuod nga syensya ug pagpanalipod sa kinaiyahan, diin gigamit nila ang Godot Engine ug Blender sa pag-agak niining proyekto ubos sa paggiya sa ilang project advisor Ace B. Cardeño.
Gipasiugdahan ang maong summit sa Krafton, ang sikat nga game developer luyo sa PUBG, kauban ang Junior Achievement (JA) Korea aron maghatag og coaching ug mentoring sa mga batan-ong creators. Nakadawat og dakong pagdayeg ang mga estudyante gikan syudad sa Valencia tungod sa ilang propesyonal nga pagdumala, pakigbatok sa hagit sa teknolohiya, ug abilidad nga mahimong kapuslanan ang syensya pinaagi sa usa ka makalingaw nga dula
Photo courtesy: VNHS/Ace Cardeño
