Mitaliwan na sa edad nga 93-anyos ang NBA legend nga si Bob Pettit, ang unang nakadawat sa Most Valuable Player o MVP award sa kasaysayan sa National Basketball Association.
Gikumpirma sa iyang alma mater nga Louisiana State University ang iyang pagkamatay. Si Pettit usa ka 11-time NBA All-Star ug nahimong unang magdudula sa NBA nga nakaabot sa 20,000 career points.
Niadtong 1956, nahimo siyang unang nakadaog sa NBA MVP award, ug nakadawat usab siya sa maong pasidungog niadtong 1959. Usa sa labing halandumon nga bahin sa iyang career mao ang pagdala niya sa St. Louis Hawks ngadto sa kampeonato niadtong 1958 human nila pildihon ang Boston Celtics.
Sa Game 6 sa Finals, mibida si Pettit human siya makapuntos og 50 sa ilang 110-109 nga kadaogan batok sa Celtics. Gipasidunggan usab si Pettit pinaagi sa pagpasulod kaniya sa Naismith Basketball Hall of Fame niadtong 1971.
Tungod sa iyang dakong kontribusyon sa basketball ug sa iyang 6-foot-9 nga gitas-on, giila siya isip usa sa mga higanteng personalidad sa kasaysayan sa NBA.
Photo courtesy: Instagram
