Patay ang giilang Top 1 Most Wanted Person sa Malaybalay City ug tibuok lalawigan sa Bukidnon nga si Richard Dagasal Dagno, 47-anyos, human kini nisukol ug nakipag-pinusilay sa kapulisan sa Sitio Lagaan, Barangay Apo Macote niadtong Setyembre 24, 2026, sa mga alas 11:58 sa buntag. Ang maong hiniusang operasyon gipahigayon sa Malaybalay CPS kauban ang Bukidnon 1st PMFC, Bukidnon PIU, Bukidnon PIT, ug RIU 10 aron isilbi ang warrant of arrest alang sa kasong Murder (Criminal Case No. 39294-22) nga giisyu niadtong Agosto 9, 2022 ug walay gitugot nga piyansa.
Subay sa imbestigasyon sa kapulisan, niabot ang suspek sa maong lugar sakay sa usa ka itom nga Honda Beat nga motorsiklo (Plate No. K6340J) nga gimaneho sa usa ka 38-anyos nga drayber. Pagkakita sa mga ototoridad, unang nipusil si Dagno ngadto sa Tracker Team hinungdan nga napugos ang kapulisan sa pagbalos alang sa self-defense. Naigo si Dagno sa iyang dughan ug adunay duha ka samad sa luyo sa likod sa lawas nga niresulta sa iyang hinanaling kamatayon, samtang nakumpiska gikan sa crime scene ang usa ka .38 revolver nga adunay duha ka nagamit nga basyo ug tulo ka buhing bala, kauban ang duha ka basyo sa 9mm.
Samtang misulay man sa pag-ikyas ang drayber sa motorsiklo, daling nakuptan kini sa mga nagresponde nga pulis ug nakuhaan og gibana-bana nga 0.5 gramo sa gidudahang uga nga dahon ug trigo sa marijuana nga nagkantidad og Php 60.00. Ang nadakpan nga drayber, motorsiklo, ug ang nakumpiskar nga ilegal nga droga gidala na sa Malaybalay CPS alang sa hustong disposisyon, samtang ginaandam na sa kapulisan ang pagpasaka og kasong Attempted Murder ug paglapas sa Section 11 sa RA 9165.
Photo courtesy: Malaybalay CPS
