Patay ang 23-anyos nga driver sa motorsiklo human kini nibangga sa usa ka tuod nga kahoy nga gihimong temporary early warning device sa Purok 6, Barangay Baroy, Kadingilan, Bukidnon, alas-9:40 sa buntag, Setyembre 23, 2026.
Ang maong troso gibutang sa karsada sa driver sa usa ka naguba nga Bongo truck aron magsilbing pasidaan sa mga nag-agi nga sakyanan.
Nakaangkon og grabeng samad sa ulo ang biktima human kini natagak ug nabagdok sa sementadong karsada gikan sa iyang gisakyang itom nga TVS motorcycle. Paspas pa kining gidala sa Bukidnon Provincial Hospital sa Kibawe, apan pormal nga gideklarang Dead on Arrival (DOA) sa attending physician.
Kasamtangang giimbestigahan na sa lokal nga kapulisan ang 39-anyos nga drayber sa Bongo truck ug ang tibuok nga nahitaboan alang sa saktong disposisyon sa maong aksidente.
Photo courtesy: Valencia CPS
