Madasigong giabiabi sa Lokal nga Pangagamhanan sa Valencia, pinaagi sa Anti-Illegal Drugs and Substance Abuse Division (AIDSAD), ang delegasyon gikan sa LGU sa Butuan City alang sa usa ka benchmarking activity bahin sa Drug-Free Workplace Program sa dakbayan niadtong Setyembre 23, 2026.
Atol sa maong tigum, gipaambit sa mga opisyal sa Valencia City ang ilang maayong pamaagi sa pagpatuman sa maong programa. Naglakip kini sa institutionalization pinaagi sa lokal nga ordinansa, ug ang pag-apil sa mga anti-illegal drug initiatives sa Local Anti-Drug Plan of Action (LADPA). Gipasigarbo usab ni Mayor Amie Galario ang padayong inisyatiba alang sa drug-free workplace ug ang pagpalig-on sa mga programa batok sa gidiling drugas, nga nakadawat og bug-os nga suporta gikan sa 10th Sangguniang Panlungsod sa pagpanguna ni Vice Mayor Greizl Galario-Fernandez.
Naghatag usab og mahinungdanong impormasyon si City Local Government Operations Officer (CLGOO) Jan Eric Manasan bahin sa pagpatuman sa maong mga programa. Makahuluganon usab nga nagpaambit sa ilang mga ideya ug sugyot bahin sa proseso ug mekanismo sa Drug-Free Workplace Program sila City Spokesperson Jun Galario, Chairperson sa Committee on Peace and Order Councilor Rollando Centillas, City Administrator Atty. Heinz Guderian Villanueva, City Health Officer Atty. Michael Escalante, M.D., CADAC Focal Coordinator Giovani Asis, ug City Legal Officer Atty. Francesco Manuel Valdez V.
Naghatag ang maong aktibidad og maayong oportunidad sa duha ka lokal nga pangagamhanan alang sa pagbayloay og kahibalo ug best practices aron mas mapalig-on ang ilang mga programa batok sa ginadiling drugas.
Photo courtesy: LGU – Valencia City
