Nadakpan sa mga awtoridad ang duha ka suspetsado nga nagpayuhot sa ginadiling drugas, lakip na ang usa ka High Value Individual (HVI), atol sa gipahigayon nga joint buy-bust operation niadtong Setyembre 22, 2026, mga alas 6:51 sa gabii sa Purok 11, Barangay Poblacion, Valencia City, Bukidnon.
Giila ang mga nadakpan nga sila alyas “Ric-Ric”, 39 anyos nga lalaki kinsa HVI, kauban ang laing ka 30 anyos nga lalaki nga giila usab nga Street Level Individual. Ang maong operasyon gipahigayon sa Valencia City Police Station (CPS) Drug Enforcement Unit ug Bukidnon 2nd PMFC, uban sa pakigtambayayong sa Provincial Intelligence Unit, RMFB 10, PDEA-Bukidnon, ug sa City Anti-Drugs Special Unit Team (CADSUT) sa Office of the City Mayor.
Nakuha gikan sa mga suspetsado ang tulo ka heat-sealed ug usa ka knot-tied nga transparent plastic sachet nga adunay sulod nga gituohang shabu nga nagtimbang og 121 gramos ug nagkantidad og ₱822,800.00.
Giandam na karon ang mga kasong paglapas sa Sections 5 ug 11, Article II sa Republic Act 9165 alang sa pormal nga pagpasaka sa korte, samtang ang mga nakumpiskang drugas gidala na sa Provincial Forensic Unit alang sa eksaminasyon.
Photo courtesy: Valencia CPS
