Gipalig-on sa City Government sa Malaybalay ang pakigtambayayong niini sa nasod sa Japan pinaagi sa pagpirma sa usa ka Memorandum of Understanding (MOU) kauban ang JIZOKU, INC. niadtong Setyembre 21, 2026 sa City Hall, Barangay Casisang. Ang maong kasabotan nag-abli og mga oportunidad alang sa pagpalambo sa Agriculture, Forestry and Other Land Use (AFOLU) carbon-credit projects sa Malaybalay ug ubang angayan nga dapit sa Bukidnon ubos sa Joint Crediting Mechanism (JCM) sa Pilipinas ug Japan.
Pinaagi niining kolaborasyon, tumong sa duha ka bahin nga mapadali ang mga inisyatibo sa pagpanalipod sa kalikopan, pagkunhod sa epekto sa climate change, pagpreserba sa mga watershed, ug pagpalambo sa biodiversity. Sigurohon usab sa maong proyekto ang sustainable land management aron direktang makadawat og kaayohan ug pakinabang ang mga lokal nga komunidad.
Gisaksihan ang maong pagpirma sa MOU sa mga lider sa Indigenous Cultural Communities (mga Lumad), mga opisyal sa nagkadaiyang departamento sa dakbayan, ug ang mga representante gikan sa JIZOKU nga sila Mr. Eleazar Reyes, Mr. Ike Alon, ug Ms. Chona Hamlag.
Giisip kini nga usa ka dako ug importanteng lakang alang sa pagpalambo sa internasyonal nga pakig-uban alang sa subli ug malungtarong pagpanalipod sa kalikopan sa Malaybalay City.
Photo courtesy:Malaybalay City LGU
