Nagpagawas og opisyal nga advisory ang City Health Office (CHO) sa Malaybalay City aron pasidan-an ang publiko bahin sa mga taho nga adunay pipila ka mga indibidwal nga nagbalay-balay ug nagtanyag o nag-inject og pneumonia vaccine.
Giklaro ni Health Education Promotion Office III Megan Dominguez sa pakighinabi sa Juander Radyo Malaybalay nga wala gayud nagpadala ang ilang opisina og bisan kinsang personnel o Barangay Health Worker (BHW) aron mag-house-to-house alang sa maong pagpabakuna.
Dugang pa sa opisyal, ang pagpabakuna alang sa pulmonya adto ra gayud ginahimo sa mga Barangay Health Station o sa mismong City Health Office, ug mga lisensyadong midwife o nurse ra ang gitugotan niini. Giklaro usab sa CHO nga kasamtangang walay supply sa maong bakuna gikan sa Department of Health (DOH) para sa dakbayan, bisan pa man nga libre kini nga ihatag sa mga priority population sama sa mga senior citizens ug kadtong adunay comorbidities kon mag-abot na ang bag-ong stocks.
Tungod niini, giawhag sa CHO ang tanang lomolupyo nga dili motuo o magpabakuna sa mga tawo nga nagalibot-libot sa mga barangay tungod kay dili masiguro ang kaluwasan ug kaepektibo sa maong tambal ug isumbong o i-report sa pinakaduol nga health center o sa kapulisan kon adunay mga indibidwal nga magpakaaron-ingnong taga-health office aron matagahan dayon og saktong lakang sa otoridad
Photo courtesy:CHO Malaybalay
