Gipahunong una ang nakatakdang nationwide simultaneous active shooter o active-threat drill sa mga pampubliko ug pribadong eskwelahan sa tibuok nasud nga unta ipahigayon karon, Agosto 25, sumala sa kumpirmasyon gikan sa opisina ni Department of Education (DepEd) Secretary Sonny Angara. Gilauman nga magpagawas ang DepEd og pormal nga pahayag ug kompletong detalye bahin sa hinungdan sa pagpalangan ug sa bag-ong iskedyul sa training.
Ang nationwide drill unang gipahibalo sa DepEd atol sa Senate hearing, diin gipatin-aw ni DepEd Undersecretary Malcolm Garma nga tumong niini ang pagsulay sa kaandam, proseso sa pag-ikyas, ug pag-reunify sa mga estudyante ug ilang mga ginikanan kung adunay hulga o kapintasan sulod sa eskwelahan. Gihimo ang mga safety protocol uban sa Philippine National Police (PNP) ug Department of the Interior and Local Government (DILG), human sa mga insidente sa pagpamusil ug kapintasan sa pipila ka campus, ilabina sa Tacloban City ug Zamboanga City. Una na usab nga nagpahigayon ang DepEd og pilot simulation sa pipila ka eskwelahan niadtong Hulyo.
Bisan pa sa pagpalangan sa nationwide drill, padayon ang pahimangno sa mga awtoridad sa mga eskwelahan nga palig-onon ang seguridad, hapsay nga pagbantay, ug tukmang mga precautionary measures aron malikayan ang kahadlok o trauma sa mga kabataan sa umaabot nga mga training. Apan, misupak ang grupo sa mga psychologist sa matang sa drill tungod sa kabalaka nga mahimo kining makapadugang sa paghatag og pagtagad sa sensitibong mga insidente ug mahimong adunay dili maayong epekto sa emosyonal ug sikolohikal nga kahimtang sa mga estudyante.
Photo courtesy: Wikipedia
