Giaprubahan sa Senado niadtong adlawng Huwebes, Oktubre 8, sa ikatulo ug kataposang pagbasa ang balaudnon nga maghigpit sa paggamit sa social media sa mga kabataan nga ubos sa 18-anyos ang edad.
Gipasa pinaagi sa botong 16-1-0, ang Senate Bill No. 2424 o ang Child Online Safety and Protection Act, diin ang tumong niini mapanalipdan ang mga bata gikan sa pisikal, mental, sosyal, ug emosyonal nga kadaut nga mahimong hinungdan sa nagkalain-laing social media platforms.
Ubos sa bag-ong balaod, gidili na ang pagparehistro, pag-access, paggamit, o pagmintinar og account sa bisan unsang age-restricted social media platform sa tanan nga nag-edad ubos sa 18 anyos.
Gikinahanglan usab nga magbutang og opisyal nga representante sa Pilipinas ang tanang internasyonal nga social media platforms nga naglihok sa nasud, ug magtinabangay sa mga awtoridad aron masiguro ang tuman sa balaod.
Ang mga kalapasan adunay dako nga silot: ang mga high-risk digital services mahimong multahan gikan sa P5 milyon hangtod P20 milyon sa matag kalapasan. Samtang ang mga ginikanan o legal nga guardian nga mapakyas sa pagbantay ug pagtuman sa balaod mag-atubang usab og multa gikan sa P5,000 hangtod P20,000, o mahimong ipahamtangan og community service.
