Mokabat sa 103 ka mga infrastructure project nga mukantidad sa P688 million nga gipondohan sa Lokal nga Panggamhanan sa Cagayan de Oro ang nakitang walay ebidensya nga nasugdan sa pagtukod o nahuman sa konstruksyon taliwala nga naka-advance na og bayad sa mga kontraktor nga mubalor sa P118 million.
Kini nga datus base sa report gikan sa Commission on Audit kon COA gikan bulan sa Enero hangtud Disiyembre tuig 2025 nga gipaambit sa buhatan ni Cagayan de Oro City Councilor Imee Rose Moreno.
Sumala pa ni Konsehal Moreno nga kini nga mga datus gikan sa COA usa sa sukdanan kung unsa na ang mga kalampusan ug kakulangan sa syudad. Apan dakong bahin sa COA report makita ang kapakyasan sa syudad nga madeliver ang gikinahanglang mga proyekto sa katawhan.
Dili siya babag sa bisan unsang proyekto, buot lamang niya nga adunay klarong agi o accomplishments lakip na transparensya ug accountability.
Giklaro sab sa opisyal nga wala siya nagatutok sa mga problema o kakulang apan andam siyang mutabang sa LGU nga pangitaan og kasulbaran ang giatubang nga mga problema sa syudad labi pa nga direkta kining nakaapekto sa kinabuhi sa mga kagay-anon.
