Nadakpan sa hiniusang manhunt operation sa kapulisan ang usa ka 39-anyos nga lalaki nga giila lamang sa alyas nga “JES,” nga giklasipikar isip Top 1 Provincial Level Most Wanted Person, alas 12:30 sa udto niadtong OKTUBRE 10, 2026, sa San Isidro, Davao Oriental.
Gipahigayon ang operasyon sa mga personahe sa San Isidro Municipal Police Station (MPS), ubos sa pagpangulo ni PMAJ Sthamoel T. Dujali, uban sa PIDMU, DOPPO Tracker Team, Provincial Intelligence Unit (PIU), Provincial Drug Enforcement Unit/Special Operations Team (PDEU/SOT), ug Regional Public Safety Battalion (RPSB) Cluster 17.
Nadakpan ang suspek pinaagi sa warrant of arrest nga giisyu ni Presiding Judge Hon. Emilio G. Dayanghirang III sa Regional Trial Court, 11th Judicial Region, Branch 32, Lupon, Davao Oriental, niadtong Hulyo 29, 2026, may kalabotan sa kasong murder ubos sa Criminal Case No. 2275-17, nga walay girekomendar nga piyansa. Human sa pagdakop, gipahibalo ang suspek sa iyang mga katungod ubos sa Konstitusyon sa pinulongan nga iyang nasabtan.
Anaa na siya karon sa kustodiya sa San Isidro MPS alang sa hustong disposisyon ug dugang nga mga proseso sa balaod. Ang maong operasyon kabahin sa padayong paningkamot sa kapulisan sa pagdakop sa mga wanted person ug pagpalig-on sa kalinaw ug kahusay sa komunidad.
Photo courtesy: San Isidro MPS
