Dead on Arrival (DOA) ang usa ka 28-anyos nga drayber sa motorsiklo human nawad-an sa kontrol ug nahulog sa may pangpang nga bahin sa National Road sa Purok 1, Sitio Tal-uban, Barangay Basak, Talakag, Bukidnon kaniadtong Oktubre 11, 2026, pasado alas 10:26 sa buntag.
Giila ang biktima nga usa ka residente sa Poblacion 1, Tamparan, Lanao del Sur kinsa nagmaneho sa itom nga Yamaha Aerox 155 (plate number 693KUF).
Base sa imbestigasyon nga gipangulohan ni PMAJ Lance Elpedio L. Figuracion sa Talakag Municipal Police Station, gikan sa Marawi City ang drayber ug padulong unta sa Cagayan de Oro City dihang nahitabo ang aksidente sa kurbada ug padulhog nga bahin sa dalan.
Tungod sa kusog nga impact sa pagkahulog, nakahiagom og ubay-ubay nga samad sa lawas ang biktima ug gidali pagdala sa Barangay Basak Rescue ngadto sa Bukidnon Provincial Hospital sa Talakag, apan gipadayag nga namatay na sa attending physician.
Sa karon padayon ang koordinasyon sa kapolisan sa lokal nga pagagamhanan sa nahisgutang lugar alang sa posibleng lakang aron malikayan ang susamang insidenti. Samtang gipalawman ang imbestigasyon sa nahitabo.
Photo courtesy: Talakag MPS
