Giklaro ni Department of the Interior and Local Government Secretary Jonvic Remulla nga dili ang ilang ahensya ang mipalit sa gagmay nga fire-fighting vehicles nga gikatahong nagkantidad og 10 milyones pesos matag usa.
Kini human mikaylap sa social media ang mga hulagway sa tulo ka mini fire trucks nga gilangkit sa plano sa DILG nga pagpalit og bag-ong mga sakyanan alang sa Bureau of Fire Protection.
Matod ni Remulla, ang lokal nga panggamhanan sa Nueva Ecija maoy mipalit sa maong mga sakyanan ug dili ang DILG. Gipahigayon ang maong pagklaro aron matul-id ang mikaylap nga impormasyon ug malikayan ang dugang kalibog sa publiko bahin sa pagpamalit og mga firefighting vehicles.
