Plano sa Department of Education (DepEd) nga mapalapdan ang paggamit sa CCTV cameras sa tanang pampublikong eskwelahan sa nasud sa dili pa matapos ang tuig, aron mapalig-on ang seguridad batok sa pagpamusil ug uban pang hulga sulod sa mga eskwelahan.
Sumala kang DepEd Assistant Secretary Roger Masapol, misaka na sa 49 porsiyento ang mga eskwelahan nga adunay CCTV, gikan sa 36 porsiyento sa unang security audit human sa insidente sa Tacloban.
Ang pondo alang sa pagbutang sa mga CCTV naggikan sa maintenance and other operating expenses sa mga eskuwelahan, lokal nga kagamhanan ug parent-teacher associations.
Apan gipasiugda ni Masapol nga dili igo ang pagbutang lamang og CCTV kung walay kawani nga aktuwal nga nagbantay ug nagmonitor sa mga hulagway nga makuha niini.
Tungod niini, gimandoan sa DepEd ang mga eskuwelahan nga ibutang ang CCTV monitors sa mga lugar diin adunay mga kawani nga kanunay nga makasubay niini.
Ubos sa kasamtangang polisiya sa ahensya, girekomendar ang labing menos lima ka CCTV cameras sa gagmayng eskuwelahan, 10 hangtod 15 sa mga medium-sized school, ug 20 o labaw pa sa dagko ug labing dagkong eskuwelahan.
Photo courtesy : DEPED
