Mikunhod og 4.5 porsyento ang benchmark index sa Philippine Stock Exchange (PSE) niadtong Agosto. Sumala sa monthly report sa PSE, nakatampo sa pag-ubos sa stock market ang pagsaka sa policy rate sa Bangko Sentral ng Pilipinas.
Lakip niini ang pagkahuyang sa piso nga miabot sa rekord nga ubos nga bili, ug ang sunod-sunod nga pagpaubos sa mga international institution sa ilang pagtag-an sa pagtubo sa ekonomiya sa nasud.
Sa kinatibuk-an, ubos na sa 1.6 porsiyento ang index sukad sa pagsugod sa tuig. Narekord usab ang net outflow nga 16.56 billion pesos sa mga transaksiyon sa langyaw nga mga mamumuhunan niadtong Agosto, lahi sa net inflow nga 7.05 billion pesos niadtong Hulyo.
Samtang, miabot sa 20.86 billion pesos ang kinatibuk-ang net foreign selling sa unang walo ka bulan ning tuiga, mas ubos kumpara sa 45.43 billion pesos sa samang panahon sa miaging tuig.
Gilauman sa Bangko Sentral nga moabot na lamang sa 1.8 billion dollars ang net inflow sa foreign portfolio investments sa tibuok 2026, layo sa una nilang pagtag-an nga 3.7 billion dollars.
Gipasidan-an usab sa BSP nga magpabiling pag-usab-usab sa dagan sa foreign portfolio investments, depende sa kahimtang sa global market ug financial sector.
