Namatay ang 30 ka tawo tungod sa landslide sa usa ka landfill sa Guinea human sa kusog nga ulan nga mibundak sa tibuok gabii. Nahitabo ang insidente usa ka semana human gipahibalo sa gobyerno ang plano nga sirad-an ang landfill ug ibalhin ang mga basura tungod sa peligro nga dala niini, ilabina panahon sa ting-ulan.
Sumala sa taho sa gobyerno, nahitabo ang landslide mga alas-2 sa kaadlawon sa commune sa Conakry. Miabot sa 30 ang namatay, samtang unom ang grabeng naangol ug 16 pa ang gamay ra og samad. Gigamit na sa mga rescue worker ang excavator ug uban pang mga kagamitan aron masusi ug pangitaon ang mga posibleng biktima sa lugar sa landslide.
Miduaw si Prime Minister Amadou Oury Bah sa landfill niadtong Domingo aron masuta ang gidak-on sa trahedya ug pagdumala sa tubag sa gobyerno. Nanawagan siya sa publiko nga magpabiling kalmado, magpakita og panaghiusa, ug hugot nga mosunod sa mga instruksyon sa rescue services ug sa mga awtoridad nga nagdumala sa operasyon.
Photo courtesy: LA Times
