Maghiusa ang mga batan-ong lider gikan sa nagkadaiyang bahin sa Bukidnon alang sa tulo ka adlaw nga Bukidnon Youth Camp 2026 nga ipahigayon sa munisipyo sa Quezon, Bukidnon, karong Oktubre 16 hangtod 18.
Sa eksklusibong pakighinabi sa Juander Radyo Malaybalay, gipatin-aw ni Alejandro Dano, Acting Head sa Provincial Youth Development Division o PYDD, nga tumong sa maong kalihokan ang pagpalig-on sa abilidad sa mga batan-on sa pagpangulo, pagdumala sa komunidad, ug pag-atubang sa mga krisis ug emerhensya.
Lakip sa mga hisgotan sa kampo ang survival skills, diin tudloan ang mga partisipante sa pagpangita og panginabuhian ug pagtukod og temporaryong kapuy-an panahon sa emerhensya. Tutokan usab ang leadership ug mental health aron mapalambo ang ilang kahibalo, panghunahuna, ug kapasidad isip mga lider sa komunidad.
Tungod sa limitado, ang mga napili lamang nga Local Youth Development Officers o LYDOs, mga miyembro sa Local Youth Development Council o LYDC, ug pipila ka batan-ong lider gikan sa 20 ka munisipyo ug duha ka dakbayan sa probinsya ang mahimong partisipante.
Gilauman nga ipaambit sa mga makatambong ang ilang mga nakat-onan ngadto sa ilang tagsa-tagsa ka lungsod ug barangay aron mas daghang batan-on ang makabenepisyo sa maong programa
Photo courtesy: Bukidnon Youth Development Office
