Nanguna ang Barangay Aglayan ug Barangay 8 sa nagkalainlaing kategorya sa gipahigayong “PAGDAYEG 2026: Honoring Excellence in Barangay Public Service” niadtong Oktubre 9, 2026, sa Casisang, Malaybalay City. Ang maong pasidungog gipangunahan sa Kagamhanang Lokal sa Malaybalay kauban ang DILG City Field Office aron pasidunggan ang mga barangay nga nagpakita og maayong pamunoan ug epektibong serbisyo publiko.
Sa maong programa, gipadayag ni City Mayor Jay Warren R. Pabillaran nga ang tinuod nga ganti sa usa ka pampublikong alagad nagagikan sa katagbawan sa iyang mga katawhan pinaagi sa matinud-anon ug responsableng pagserbisyo ubos sa usa ka demokratikong gobyerno. Samtang gidayeg usab ni DILG 10 Regional Director Bruce A. Colao ang tanang opisyal ug naglaum nga magsilbi kining inspirasyon aron mas mapalambo pa ang pagserbisyo sa matag katawhan sa Malaybalay City.
Hisayrang mihakot ang Barangay Aglayan sa halos tanang dagkong premyo sa Kategorya A (mga barangay nga may NTA nga ₱5 milyon pataas), lakip na ang 1st Place sa Seal of Good Local Governance for Barangays (SGLGB), Local Legislative Awards (LLA), ug Lupong Tagapamayapa Incentives Awards (LTIA). Sa Kategorya B sab (ubos sa ₱5 milyon nga NTA), gipangulohan sa Barangay Imbayao ang SGLGB, samtang ang Barangay 8 maoy nakalangkat sa 1st Place sa LLA ug LTIA. Gawas sa mga pangunang kategorya, giila usab ang mga special awardees sama sa Barangay Simaya alang sa VAW Desk ug Barangay Violeta alang sa BDRRMC, lakip na sila si Sylord Rhoy R. Lagang sa Aglayan isip Outstanding Barangay Secretary ug Alma L. Gayon sa Kalasungay isip Outstanding Treasurer.
Photo courtesy: DILG – Malaybalay City
