Usa ka kusog nga linog nga adunay magnitude 7.7 ang mitay-og sa Panama hinungdan sa pagkaguba sa mga dalan ug gambalay. Wala pay unang taho sa mga namatay o naangol sa maong katalagman.
Sumala sa mga awtoridad, milungtad og dul-an sa usa ka minuto ang linog ug niresulta sa kalisang sa mga residente, ilabi na sa Panama City, diin nanghawa ang mga tawo gikan sa tag-as nga mga building.
Ang labing naapektuhang mga lugar mao ang lalawigan sa Herrera, Cocle ug Los Santos. Kapin sa 80 ka aftershocks ang natala, lakip ang usa nga milapas sa magnitude 6. Temporaryo usab nga gisirhan ang internasyonal nga tugpahanan sa Panama City ug gisuspenso ang klase sa tibuok nasud.
Samtang, gipahibalo sa Panama Canal Authority nga wala maapektuhan ang operasyon sa Panama Canal. Si Presidente Jose Raul Mulino mibisita sa mga apektadong lugar aron koordinahon ang pagresponde sa katalagman ug nanawagan sa katawhan nga magpabiling kalmado.
Photo Courtesy: Le Monde
