Nasikop sa kapulisan ang usa ka 40-anyos nga lalaki kinsa gipangita sa balaod subay sa bag-ong gipagawas nga warrant alang sa kasong Homicide atol sa usa ka intelligence-driven tracking operation sa Purok Tiber, Barangay Poblacion Ward III, lungsod sa Minglanilla, sa probinsya sa Sugbo.
Matud sa kapulisan nga ang pagdakop sa suspek usa ka pagpatuman sa warrant of arrest nga gipagawas sa Regional Trial Court, 7th Judicial Region, Branch 76, City of Naga, Cebu tungod sa kasong Homicide ubos sa Article 249 sa Revised Penal Code, diin ang girekomendar nga piyansa gitakda sa ₱120,000.
Sumala sa taho sa kapulisan, ang kaso nagagikan sa usa ka insidente niadtong Mayo 19, 2026, diin ang akusado giingong miatake ug miigo sa nawong sa biktima.
Ang biktima gidala sa ospital ug giingong namatay paglabay sa duha ka adlaw tungod sa internal bleeding.
Photo Courtesy: PNP Cebu Police Provincial Office
