Arestado ang usa ka lalaki human kining nakuhaan og gituohang shabu ug armas sa gikasa nga operasyon sa mga personahe sa Argao MPS, atol sa gipahigayong search warrant sa Barangay Tulang, Argao, Cebu, niadtongf nakalabay nga adlaw.
Ang operasyon miresulta sa pagkasikop sa usa ka alias Batman, 28-anyos. Matud sa kapulisan nga ilang gihimo ang operasyon subay sa Search Warrant nga gi-isyu sa Executive Judge sa Regional Trial Court, Branch 94, sa Argao, Cebu tungod sa gituohang kalapasan niini sa Republic Act No. 10591, nga nailhan usab nga Comprehensive Firearms and Ammunition Regulation Act.
Atol sa pagpangita, nasakmit sa mga operatiba sa kapulisan ang usa ka .45 caliber pistol, usa ka steel magazine, upat ka buhing bala sa .45 caliber, ug pito ka selyadong transparent nga plastik nga mga pakete nga adunay sulod nga puti nga kristal nga substansiya nga gituohang shabu nga adunay gibug-aton nga 6.75 gramos ug gibanabanang kantidad nga ₱45,900.
Kasamtang na nga gibalhog sa selda sa kapulisan ang dinakpan samtang gihikay na usab ang patong patong nga mga kaso nga ipasaka batok kaniya.
Photo Courtesy: PNP Cebu Police Provincial Office
