Gilaumang mokunhod pag-usab ang presyo sa krudo sa Pilipinas sulod sa ikatulong nagsunod nga semana, samtang mosaka na usab ang presyo sa gasolina sugod Oktubre 13, 2026.
Matud ni Jetti Petroleum president Leo Bellas sa iyang advisory nga posibleng mokunhod og ₱1.80 hangtod ₱2 kada litro ang krudo, samtang mosaka og ₱2 hangtod ₱2.20 matag litro ang gasolina.
Gipasabot ni Bellas nga ang paglihok sa presyo sa petrolyo nalambigit gihapon sa kabalaka sa posibleng pagkaputol sa suplay tungod sa mga hulga sa seguridad ug pag-atake sa mga tanker sa Middle East.
Nakaapekto usab sa presyo ang pagsira sa produksiyon sa lana ug gas sa Gulf of Mexico tungod sa nagpaingon nga bagyo, nga posibleng makapugong sa kapasidad sa mga refinery sa Estados Unidos.
Gidugang ni Bellas nga nakatampo usab sa kabalaka sa suplay ang pagsuspenso sa China sa pag-eksport og gasolina, bisan pa sa mga taho nga posibleng tangtangon na sa dili madugay ang maong restriksiyon. Ang iyang banabana gibase sa unang upat ka adlaw nga patigayon sa Mean of Platts Singapore ug sa paglihok sa foreign exchange rates.
Photo Courtesy:AlterMidya
